有幾個大地之友問起我點解咁耐無介紹法羅趣聞，因為最近真係有啲忙。大地之子同我將會喺明年有一個重大嘅計劃，希望暑假可以實行，到時真係成事再同大家講。為左呢個計劃，我而家好努力咁返工，希望可以儲多少少錢。除左喺麵包店返工，咁啱朋友係中餐館老闆娘，佢剛剛生左小朋友，需要人幫手睇舖，於是我一口答應左。而家每日6點半到1點就返麵包店，1點到5點就返中餐館。返屋企就湊仔，所以每日只有燒賣訓著之後同我訓覺前嘅半個小時手機時間。加上喺應承中餐館嘅工作之前，我喺法羅開左間小小嘅網店，賣啲小飾物。因為麵包店嘅工作比較乏味，所以想同時做啲自己喜歡嘅事，於是就開左呢間網店，已經開左兩個月，每次客人回覆話鍾意我賣嘅產品，都好有滿足感🥰 而家兩份工作再經營網店，偶爾去市集擺攤，所以無咩時間經營個page😩😩 不過仍然好感謝大地之友們經常私下關心我❤️❤️❤️大地之嫂is feeling loved 🥰
雖然每日都好攰，但係當你有目標嘅時候，幾攰都有動力💪🏻💪🏻
當然燒賣係我最大嘅動力，佢就黎兩歲啦，而家唔知係咪叫語言爆發期，每日都不停講野，最攞命係你講咩，佢就好似鸚鵡咁跟住你講咩。之前聽我地講過oh sh*t，而家直頭學以致用，有次倒瀉左粟米片落地下，我無講oh sh*t，但佢已經學識左，仲好靈活咁應用出嚟，好浮誇咁講左十幾廿次oh sh*t🤦🏻♀️睇黎以後真係要慎言。而最值得高興嘅係，燒賣戒左人奶一個月啦！原來真係要狠心，話唔畀就唔畀，喊左3日就戒左啦👌🏻而家一日要飲幾杯牛奶先夠喉。
好啦，一次過更新完畢了，再講落去，真係唔使訓，晚安，大地之友們❤️
#siumaiismybaby
Search